អត្ថបទសិក្សា ស្ដីពី “បច្ចេកវិទ្យា និងវិស័យពាណិជ្ជកម្មនៅកម្ពុជា” វិស័យពាណិជ្ជកម្មនៅកម្ពុជាកំពុងរីកចម្រើនជាលំដាប់ បើទោះបីជាមានវត្តមាននៃវិបត្តិជំងឺកូវីដ-១៩ ក៏ដោយ។ នេះក៏ដោយសារតែពាណិជ្ជករនៅតែអាចបន្តការលក់នូវផលិតផល ឬសេវាកម្មនានាបាន តាមរយៈការធ្វើពាណិជ្ជកម្មតាមប្រព័ន្ធអេឡិចត្រូនិក និងការទូទាត់ប្រាក់តាមបែបឌីជីថល។ មិនតែប៉ុណ្ណោះ បច្ចេកវិទ្យាក៏បានជួយបង្កើននូវផលិតភាព និងស័ក្តិសិទ្ធិភាពការងាររបស់ពាណិជ្ជករ ព្រមទាំងជួយពង្រឹងសេវាកម្មកាន់តែល្អសម្រាប់អតិថិជន ដែលធ្វើឱ្យការធ្វើពាណិជ្ជកម្មកាន់តែមានភាពប្រកួតប្រជែងថែមទៀត។ ———————————— #Cambodia4point0 #ResearchArticle #TechandBusiness

ក្រុមជនងាយរងគ្រោះនៃបណ្តាប្រទេសនានាជុំវិញពិភពលោក បាននិងកំពុងជួបប្រទះនូវបញ្ហាប្រឈមជាច្រើន ដែលរារាំងពួកគាត់ក្នុងការចូលរួមក្នុងសកម្មភាពសេដ្ឋកិច្ច សង្គមបានពេញលេញដូចជនដទៃ។ ក្នុងន័យនេះ ដើម្បីចូលរួមចំណែកដល់ការលើកកម្ពស់បរិយាបន្នសង្គម បច្ចេកវិទ្យាជាច្រើនត្រូវបានបង្កើតឡើងសម្រាប់ជួយសម្រួលដល់ក្រុមជនងាយរងគ្រោះក្នុងការចូលរួមក្នុងសកម្មភាពសេដ្ឋកិច្ច សង្គម ព្រមទាំងបង្កើនឱកាសដល់ពួកគាត់ក្នុងការទទួលបាននូវធនធាន និងសេវានានា។

អត្ថបទសិក្សា ស្ដីពី “ការចូលរួមរបស់ស្ត្រីក្នុងវិស័យបច្ចេកវិទ្យានៅកម្ពុជា” ការចូលរួមរបស់ស្ត្រីក្នុងវិស័យបច្ចេកវិទ្យានៅស្ទើគ្រប់បណ្តាប្រទេសជុំវិញសកលលោក រួមទាំងកម្ពុជា នៅមានចំនួនតិចនៅឡើយ ដោយសារឧបសគ្គមួយចំនួនដូចជា បទដ្ឋានសង្គម, ចំណង់ចំណូលចិត្ត, កង្វះការយល់ដឹងពីវិស័យបច្ចេកវិទ្យា, កង្វះការលើកទឹកចិត្តពីគ្រួសារ និងកង្វះគំរូជាស្ត្រី ដែលបានរារាំងពួកគេក្នុងការចូលរួមក្នុងវិស័យនេះ។ ហេតុនេះហើយ ទាំងស្ថាប័នរដ្ឋ ផ្នែកឯកជន និងដៃគូអភិវឌ្ឍន៍ ត្រូវបន្តរួមគ្នាបញ្ជ្រាបការយល់ដឹងពីវិស័យបច្ចេកវិទ្យា និងវិទ្យាសាស្រ្ត, បន្តផ្តល់ការលើកទឹកចិត្ត ព្រមទាំងបង្កើតបរិយាកាសអំណោយផលដល់ស្ត្រី ដើម្បីទាក់ទាញឱ្យស្ត្រីចូលរួមក្នុងវិស័យដ៏សំខាន់នេះកាន់តែច្រើន៕ ———————————— #Cambodia4Point0 #WomenandTech #ស្ត្រីនិងបច្ចេកវិទ្យា

បណ្តាប្រទេសជាច្រើនជុំវិញពិភពលោកសុទ្ធតែបាននឹងកំពុងជួបប្រទះនូវបញ្ហាប្រឈមដែលកើតចេញពីកំណើនប្រជាជនមករស់នៅក្នុងទីក្រុង ដែលបានបង្កជាសម្ពាធដល់បរិស្ថាន, ធនធាន និងនិរន្តរភាពសង្គមសេដ្ឋកិច្ច ដែលតម្រូវឱ្យមានការរៀបចំផែនការឱ្យបានត្រឹមត្រូវ និងមានប្រសិទ្ធភាព។ ក្នុងន័យនេះ ការធ្វើនគរូបនីយកម្មពិតជាមានសារៈសំខាន់ និងភាពចាំបាច់ សម្រាប់ការធានានិរន្តរភាពនៃការអភិវឌ្ឍសេដ្ឋកិច្ច-សង្គម ហើយបច្ចេកវិទ្យាបានដើរតួនាទីយ៉ាងសំខាន់ក្នុងការពង្រឹងការធ្វើផែនការនគរូបនីយកម្ម ដែលអាចជួយឆ្លើយតបទៅនឹងបញ្ហាប្រឈមនានានៅក្នុងទីក្រុង សំដៅធានាការអភិវឌ្ឍទីក្រុងប្រកបដោយនិរន្តរភាព និងបរិយាបន្ន។ #Cambodia4Point0 #ResearchArticle #TechandUrbanization #បច្ចេកវិទ្យានិងនគរូបនីយកម្ម

ជាមួយនឹងការរីកចម្រើនឥតឈប់ឈរនៃបច្ចេកវិទ្យា អ្នកវាយប្រហារតាមប្រព័ន្ធអ៉ីនធឺណិតក៏កាន់តែស្វែងរកគន្លឹះ និងវិធីសាស្រ្តថ្មីៗក្នុងការប្រព្រឹត្តល្មើស ដើម្បីអាចទាញយកផលប្រយោជន៍កាន់តែច្រើនពីជនរងគ្រោះ ដែលបង្កជាហានិភ័យយ៉ាងខ្លាំងដល់ស្ថាប័នរដ្ឋ និងឯកជន ព្រមទាំងប្រជាពលរដ្ឋគ្រប់រូបដែលជាអ្នកប្រើប្រាស់អ៉ីនធឺណិត។ #Cambodia4Point0 #ResearchArticle #Cybersecurity

ភាពជឿនលឿននៃបច្ចេកវិទ្យាបាននិងកំពុងផ្លាស់ប្តូរជីវិតរស់នៅប្រចាំថ្ងៃរបស់យើង ដោយផ្តល់នូវអត្ថប្រយោជន៍ជាច្រើន ពិសេសជួយសម្រួលដល់ការផ្សព្វផ្សាយ និងការទទួលបានព័ត៌មាន។ ទន្ទឹមនឹងអត្ថប្រយោជន៍ទាំងនេះ ការផ្លាស់ប្តូរឥតឈប់ឈរនៃបច្ចេកវិទ្យាក៏បានបង្កើតនូវគំរូអាជីវកម្មថ្មី និងបានផ្លាស់ប្តូរឥរិយាបថរបស់អ្នកអាន ដែលតម្រូវឱ្យក្រុមហ៊ុនសារព័ត៌មានត្រូវចេះសម្របខ្លួន ហើយបុគ្គលិកដែលបម្រើការនៅក្នុងវិស័យសារព័ត៌មានក៏មានភាពចាំបាច់ក្នុងការស្វែងយល់ និងចាប់យកជំនាញសមស្របបន្ថែមទៀត ដើម្បីបំពេញតាមតម្រូវការរបស់អ្នកអាន។ #Cambodia4Point0 #ResearchArticle #DigitalMedia

អក្ខរកម្មឌីជីថលពិតជាមានសារៈសំខាន់ និងភាពចាំបាច់ សម្រាប់ទ្រទ្រង់ដល់ការអភិវឌ្ឍសេដ្ឋកិច្ច សង្គមនៅកម្ពុជា ក៏ដូចជានៅក្នុងក្របខណ្ឌតំបន់អាស៊ាន នាពេលបច្ចុប្បន្ន និងអនាគត ស្របពេលជាមួយនឹងការមកដល់នៃបដិវត្តន៍ឧស្សាហកម្ម ៤.០ និងការប្រែប្រួលឥតឈប់ឈរនៃបរិបទសង្គម។ កម្ពុជា និងអាស៊ាន មានភាពចាំបាច់ក្នុងការចាប់យកកាលានុវត្តភាពដ៏ពិសេសនេះ តាមរយៈការសម្របខ្លួន និងចាប់ឱកាសពីសក្តានុពលនៃបដិវត្តន៍ឧស្សាហកម្ម ៤.០។ នៅក្នុងយុគសម័យឌីជីថលនេះ “អក្ខរកម្មឌីជីថល” នឹងចូលរួមយ៉ាងសំខាន់ដល់ការលើកកម្ពស់គុណភាពជីវិតប្រជាពលរដ្ឋ សំដៅធានាបាននូវសង្គម-សេដ្ឋកិច្ចមួយ ប្រកបដោយសមធម៌ បរិយាបន្ន និងគង់វង្ស៕ #Cambodia4Point0 #ResearchArticle #DigitalLiteracy #អក្ខរកម្មឌីជីថល

អត្ថបទសិក្សា ស្តីពី "បច្ចេកវិទ្យាសម្រាប់សហគ្រាសធុនតូច និងមធ្យមនៅកម្ពុជា" សហគ្រាសធុនតូច និងមធ្យម បានដើរតួនាទីយ៉ាងសំខាន់នៅក្នុងចរន្តសេដ្ឋកិច្ចជាតិ ដោយជាផ្នែកមួយចូលរួមពង្រឹងខ្សែច្រវាក់ផលិតកម្មនៅក្នុងវិស័យឯកជនដែលជាក្បាលម៉ាស៊ីននៃកំណើន។ ជាមួយការមកដល់នៃបដិវត្តន៍ឧស្សាហកម្ម ៤.០ ក៏ដូចជាការប្រែប្រួលនៃតម្រូវការ និងការផ្គត់ផ្គង់ដោយសារឥទ្ធិពលនៃវិបត្តិជំងឺកូវីដ-១៩ សហគ្រាសធុនតូច និងមធ្យម មានភាពចាំបាច់ក្នុងការចាប់យក និងសម្របខ្លួនជាមួយការប្រើប្រាស់បច្ចេកវិទ្យាថ្មីៗ ដើម្បីរក្សាបាននូវភាពប្រកួតប្រជែង និងនិរន្តរភាពនៃអាជីវកម្ម៕ https://cambodia4point0.org/kh/pdf-content/research-papers #Cambodia4Point0 #SMEs #TechforSMEs

អត្ថបទសិក្សា ស្តីពី "ការអភិវឌ្ឍទីក្រុងឆ្លាត៖ ករណីកម្ពុជា និងអាស៊ាន" កំណើនប្រជាជនលើពិភពលោកបានកើនឡើងគួរឱ្យកត់សម្គាល់នារយៈកាលប៉ុន្មានទសវត្សរ៍ចុងក្រោយនេះ។ ការណ៍នេះបានបង្កជាសម្ពាធលើធនធាន ហេដ្ឋារចនាសម្ព័ន្ធ បរិស្ថាន និរន្តរភាពសង្គម និងសេដ្ឋកិច្ចនៅក្នុងទីក្រុង ខណៈដែលតម្រូវការមានការកើនឡើងជាបន្តបន្ទាប់។ ក្នុងន័យនេះ ចាំបាច់ទាមទារឱ្យមានការគិតគូររកដំណោះស្រាយសម្រាប់ការអភិវឌ្ឍទីក្រុងប្រកបដោយនិរន្តរភាព និងភាពប្រកួតប្រជែង ដោយក្នុងនោះការកសាងទីក្រុងឆ្លាតត្រូវបានមើលឃើញថាជាយុទ្ធសាស្ត្រដ៏ល្អមួយដែលអាចជួយដោះស្រាយបញ្ហាកំណើនប្រជាសាស្រ្ត និងនគរូបនីយកម្ម។ ———————————— #Cambodia4point0 #ResearchArticle #SmartCity #Cambodia #ASEAN